Құқық индустриясының трансформациясы және жаңа кәсіби бағдар

2026 жылғы 23 ақпанда сағат 11:00-де біз құқық саласының болашағына арналған стратегиялық деңгейдегі қонақ дәрісін ұйымдастырамыз. Кездесу құқық мамандығында саналы бағыт таңдау, технологиялық өзгерістерге бейімделу және жаһандық нарық талаптарына сай кәсіби позиция қалыптастыру мәселелеріне арналады.

Біздің студенттер алдында Мағауия Абай Дарханұлы сөз сөйлейді — GRATA International құрамындағы GRATA Labs департаментінің жетекшісі, SDU University аға оқытушысы, «IT Law» ғылыми орталығының негізін қалаушы. Ол интеллектуалдық меншік, IT Law және LegalTech бағыттарында маманданған, сондай-ақ Ұлыбритания, Швейцария, Эстония, Чехия және Польшада ғылыми зерттеулер мен біліктілікті арттыру бағдарламаларынан өткен.

Біз құқық, технология және халықаралық тәжірибе тоғысқан ортада жұмыс істейтін сарапшыны шақырдық. Оның кәсіби қызметі жасанды интеллекттің құқық саласына ықпалы, цифрлық трансформация және құқықтық нарықтың жаңа архитектурасын қалыптастыру мәселелерін қамтиды.

Дәрістің негізгі өзегі — тар мамандану арқылы бәсекелік артықшылық қалыптастыру, AI мен IT шешімдерінің құқықтық экожүйеге әсері және LegalTech саласының жаһандық даму перспективалары. Талқылау нақты тәжірибелік кейстер мен халықаралық практикаға негізделеді.

Біз үшін маңыздысы — студенттердің құқықты тек академиялық пән ретінде емес, үнемі өзгеріп отыратын, технологиямен тығыз байланысты стратегиялық сала ретінде қабылдауы. Осындай кездесулер кәсіби ойлау аясын кеңейтіп, болашақта саналы әрі бәсекеге қабілетті шешім қабылдауға негіз болады.